بعد ما أختي خطفت مني فرحة الجواز سنين طويلة، وافقت أتجوز راجل الكل كان بيعتبره شحات،

يوم كتب الكتاب دخل حسن لابس بدلة قديمة كان مستلفها من عم رجب وكانت واسعة عليه شوية لكن وشه كان هادي وواثق. هدير أول ما شافته قامت من مكانها وهي بتضحك وقالت بصوت مسموع هو ده العريس ولا جاي يطلب مساعدة من المعازيم؟

بعض القرايب اتضايقوا من كلامها وأمي طلبت منها تسكت لكنها كملت ضحكها. حسن ساعتها قام من مكانه وبص لها وقال قبل ما نكتب الكتاب في حاجة لازم تعرفيها يا هدير لأن الموضوع ده يخصك إنتي كمان.

سكتت هدير فجأة وبصت له باستغراب وهو مد إيده في جيبه وطلع ورقة مطوية وطلب من خالي يقراها قدام الموجودين. أول ما خالي شاف الورقة اتغير لون وشه وبص لأبويا اللي كان قاعد على كرسيه في آخر الصالة وقال بصوت متردد يا جماعة إحنا لازم نسمع حسن للآخر قبل ما أي حد يحكم عليه.

### الفصل الثاني
الصالة كلها سكتت وخالي فضل باصص للورقة كأنه بيحاول يتأكد من الكلام اللي مكتوب فيها وبعدها رفع عينه لحسن وقال له إنت متأكد إنك عايز الموضوع يتقال قدام الناس كلها؟ حسن هز راسه وقال أنا مش جاي أفضح حد ولا أعاير حد بظروفه أنا بس مش هقبل إن نبيلة تتجوزني وهي فاكرة إني إنسان تاني غير حقيقتي.

هدير كانت واقفة ومش فاهمة حاجة وقالت له إنت بتتكلم عن إيه؟ إنت جاي تتجوز أختي ولا جاي تعمل علينا فيلم؟ حسن ما ردش عليها وبص لأبويا وقال أنا عرفت والد حضرتك من سنين طويلة وكان ليا معاه موقف عمره ما راح من بالي.أبويا حاول يرفع راسه وبص له بتركيز ولما حسن قال اسمه بالكامل عيني أبويا اتسعت وبدأ يحرك إيده بصعوبة كأنه افتكر حاجة قديمة.

أمي قربت منه وسألته إنت تعرف حسن منين يا محمود؟ أبويا أخد نفس طويل وحاول يتكلم لكن الكلام كان صعب عليه فخالي طلب من حسن يحكي.

قال حسن إنه كان شغال من أكتر من عشرين سنة في شركة نقل صغيرة وإن أبويا وقتها كان مسؤول عن حسابات المخزن وإنه في يوم حصلت مشكلة كبيرة بسبب عجز في البضاعة واتهموا حسن إنه سرق جزء منها وكان ممكن يدخل السجــ,,ـــــن لولا إن أبويا راجع السجلات بنفسه واكتشف إن الغلط حصل بسبب موظف تاني كان بيزوّر أرقام التسليم.

أبويا وقتها شهد بالحقيقة قدام الإدارة وأنقذ حسن من تهمة كانت هتضيع مستقبله. بعد فترة حسن سافر يشتغل في محافظة تانية وانقطعت أخباره لكنه عمره ما نسي المعروف اللي أبويا عمله معاه. لما رجع من سفره بعد وفــ,,ـــــاه مراته وخسارته لشغله حاول يدور على أبويا عشان يطمن عليه ولما عرف إنه مريض وإن ظروف البيت صعبة بدأ ييجي المنطقة القريبة من العمارة ويسأل عنه من بعيد.

كنت فاكرة إنه كان بيقعد تحت البيت عشان يستعطف الناس لكن الحقيقة إنه كان بيشتغل ساعات في تحميل البضائع وبياخد اللي يقدر عليه من المساعدة لما الشغل يقف. حسن سكت لحظة وبعدين قال إنه عرف من عم رجب إن نبيلة هي اللي بتصرف على البيت وإنها بتساعده من غير ما تسأله عن ماضيه ولا تتعامل معاه كأنه أقل منها وإن ده خلّاه يشوف فيها إنسانة ممكن يبني معاها حياة من جديد.