ولادي الطمع عامي قلبهم وعايزين يورثوني بالحياة

ولادي الطمع عامي قلبهم وعايزين يورثوني بالحياةبعد ما جوزي مات بسنة واحدة بدأت أحس إن ولادي اتغيروا معايا من غير ما أفهم السبب في الأول وبعدها فهمت إن السبب كان الفلوس بس الفلوس كانت لسه موجودة في جيوبهم مش في البيت اللي أنا عايشة فيه أنا وجوزي الله يرحمه ساب لنا بيت قديم في منطقة شعبية والبيت كان باسمه لكن بعد ما اتقسمت التركة كل واحد من ولادي أخد نصيبه كامل وما اعترضتش ولا طلبت

منهم جنيه واحد وقلت لهم أبوكم تعب طول عمره عشانكم واللي طلع من حقكم خدتوه بالحلال والبيت ده سيبوه لي عشان ده كل اللي فاضل لي أعيش فيه ومعاه المعاش اللي جوزي سايبهولي في البداية كانوا بييجوا كل كام يوم وبعدها الزيارات بقت كل أسبوع وبعدها كل شهر وبعدها بقيت أسمع صوتهم في التليفون أكتر ما أشوفهم بعيني كنت لما أتعب أتصل بابني الكبير يقول لي حاضر يا أمي وأستناه بالساعات ومحدش ييجي ولما بنتي

تعرف إني محتاجة دواء تقول لي خلي أخويا يجيبه ولما أتصل بأخوها يقول لي خلي أختي تجيبه لحد ما بقيت أشتري حاجتي بنفسي وأنا ساكتة لكن اللي كسر قلبي إنهم كل ما ييجوا ما كانوش بيسألوا أنا محتاجة إيه كانوا بيسألوا عن الفلوس فين والمعاش كام والبيت محتاج تصليحات قد إيه وفي يوم ابني الكبير دخل عليا وقال لي يا أمي إنتي لوحدك والبيت كبير عليكي قلت له يعني إيه قال لي مفيش حاجة بس

إحنا خايفين عليكي من الوحدة وقتها ما فهمتش ليه كلامه خوّفني وبعدها بأيام جه هو وأخته واتكلموا معايا لأول مرة عن البيت وقالوا لي إن فيه مقاول عايز يشتريه بمبلغ كبير جدًا وإن البيع هيأمن مستقبلي بدل ما أفضل عايشة في بيت قديم قلت لهم وأنا أبيع بيت أبوكم وأروح فين ابني رد بمنتهى الهدوء وقال لي نأجر لك شقة صغيرة من المعاش أو ندخلك دار محترمة ونخلي فلوس البيت معانا نستثمرها عشان تفضل مضمونة

ليكي بصيت له وسكت لكن بنتي قالت الجملة اللي خلتني أحس إن جوزي لو كان عايش كان قلبه هينكسر زيي وقالت لي يا ماما إنتي خلاص مش محتاجة كل الفلوس دي وإحنا أولادك يعني الفلوس هتروح لمين غيرنا وقتها فهمت إنهم ما كانوش جايين يطمنوا عليا كانوا جايين يشوفوا إمتى أمهم تمــ,,ـــــوت أو تتنازل

2
من يومها وأنا بقيت أراجع كل موقف حصل بيني وبين ولادي من بعد وفــ,,ـــــاه أبوهم وافتكرت حاجات كنت ببررها لنفسي عشان ما أقولش إن ولادي جحدوا فيا ابني الكبير كان أول واحد خلص نصيبه من ورث أبوه اشترى عربية وفتح محل وبعد كام شهر جه وقال لي المشروع محتاج سيولة ومش عايز أطلب من حد غريب وأنا أمه فأنا ساعدته من فلوسي وبعدها اختفى تقريبًا ست شهور ولما سألته عن الفلوس قال لي يا أمي اعتبريها وقفة منك مع ابنك أنا ما كنتش طلبت منه يرجعها وقتها لأن دي كانت أول مرة أحس إني ممكن أخسر ابني لو طالبته بحقي أما بنتي فكانت كل ما تحصل لها مشكلة في بيتها تتصل بيا وتبكي وتقول لي إن جوزها متزنق وإنها محتاجة مبلغ بسيط لحد ما ربنا يفرجها وفي كل مرة كنت بديها من مدخراتي لحد ما مدخراتي قلت جدًا وفي مرة قلت لها يا بنتي أنا كمان عندي علاج ومصاريف البيت قالت لي حاضر يا ماما هردهملك أول ما أقدر لكن الفلوس ما رجعتش أما ابني الأصغر فكان أهدى منهم وكنت أقول يمكن ده الوحيد اللي قلبه لسه متعلق بيا لكنه كان كل فترة ييجي يقعد معايا شوية وبعدها يفتح كلام عن البيت ويقول لي المنطقة دي سعرها غالي أوي يا أمي ولو بعتي البيت هتعيشي ملكة قلت له أنا مش عايزة أعيش ملكة أنا عايزة أعيش في بيتي ولما بدأ المقاول يظهر في الموضوع عرفت إن أولادي كانوا بيتكلموا معاه من ورايا لأن الراجل جه مرة ومعاه ابني الكبير وفضل يمدح في البيت ويقول إن مكانه ممتاز وإنه مستعد يدفع مبلغ يخلي أي حد يوافق على البيع وبعد ما مشي ابني قال لي إحنا مش بنجبرك يا أمي بس فكري بعقلك البيت ده هيديك فلوس أكتر من اللي هتعيشي بيه عمرك كله قلت له والفلوس دي هتعمل بيها إيه قال لي نرتب لك حياتك قلت له يعني إيه قال لي شقة صغيرة في مكان هادي وباقي الفلوس نحطها في مشروع باسمنا عشان تبقى مضمونة ولما سألته ليه باسمكم قال لي عشان إنتي كبيرة وممكن حد يضحك عليكي ساعتها لأول مرة حسيت إنهم مش شايفيني أمهم هم شايفيني مبلغ مالي ماشي على رجلين